A meu pai, no seu décimo cabodano

 

Envólvome na manta cálida do teu recordo.

Evoco a túa voz, o teu riso e o teu paso.

Abro unha xanela de memoria luminosa

pola que penetran os teus xestos

de pai abnegado, humilde e xeneroso.

 Axeonllo o meu corazón ante a lembranza do teu exemplo,

a dimensión da túa entrega: tanto e tanto amor

destilado en innúmeras horas caladas de dedicación.

 Calco os pés nos camiños firmes que trazaches contra o escuro.

Bebo nos ventos que alimentaron día tras día

os lumes do teu peito, incendiado de honradez,

repleto de apertas acolledoras, caridade e compromiso.

 Respiro fondo nos bosques cheos de afecto

que un día sementaches sen poñer taxa, a eito,

sen esixir absolutamente nada a cambio.

 Elévote á altura na que quero medirme acotío.

 Abrázome ao fulgor da túa existencia:

tesouro dondo, cristalino e intacto

que me acompañará mentres eu propio perdure.

 

 

EMILIO XOSÉ ÍNSUA

28 de Outubro de 2026

 

NOVO VOLUME DA BIBLIOTECA “EMILIO ANTONIO ÍNSUA GARCÍA” DE ESTUDOS VIVEIRENSES

A Biblioteca “Emilio Antonio Ínsua García” de Estudos Viveirenses acaba de publicar o seu terceiro volume, despois dos anteriores dedicados aos literatos Xoán Pla Zubiri e Luís Sipos Magniac.

Nesta ocasión a figura abordada é Vicente Sergio López, un dos compoñentes no seu día da célebre comparsa dos “Armantes”. Rescátanse no libro máis dunha vintena de textos da súa autoría e reconstrúese a súa particular peripecia vital, truncada en flor cando apenas contaba trinta e tres anos de idade.

Esta edición de Vicente Sergio López (1848-1881). Unha promesa truncada das letras viveirenses, preparada por Emilio Xosé Ínsua, ten carácter non venal. As persoas interesadas en dispoñer dun exemplar poden recollelo de maneira totalmente gratuíta no local das Gráficas Neira Brochs, na rúa da Zapatería, núm. 27, de Viveiro, no horario habitual de atención ao público do establecemento.

En vindeiras datas está previsto que se realice unha presentación pública do libro en Viveiro, que será anunciada oportunamente.

Na morte do meu amado pai

O pasado venres 28 de outubro faleceu en Viveiro meu pai, Emilio Antonio Ínsua García.

Para el, que xa descansa para sempre, estes versos de amor, escritos na madrugada do día da súa definitiva partida.

 O corazón está en vixilia

mentres te nos vas indo, pai.

Foches un agasallo da vida,

un orballo de agarimo entregado

constantemente.

Non houbo sede

para a que non tiveses

auga que nos dar.

Non houbo soño

ao que non lle insuflases

amor, alento e riso.

Non houbo un só intre

en que nos fallase 

o teu aceno de amor

inundándonos o corazón

por sempre e para sempre.